ఏపీపై రుసాల్ దృష్టి.. భారీ అల్యూమినియం పెట్టుబడులకు లోకేష్ ఆహ్వానం

సెయింట్ పీటర్స్‌బర్గ్,జూన్ 5: ప్రపంచంలోనే అతిపెద్ద అల్యూమినియం ఉత్పత్తిదారులలో ఒకటైన రుసాల్ (RUSAL) సంస్థను ఆంధ్రప్రదేశ్‌లో భారీ పెట్టుబడులు పెట్టాలని రాష్ట్ర విద్య, ఐటీ, ఎలక్ట్రానిక్స్ శాఖల మంత్రి నారా లోకేష్ ఆహ్వానించారు. రష్యాలోని సెయింట్ పీటర్స్‌బర్గ్‌లో జరిగిన సమావేశంలో రుసాల్ సీనియర్ మేనేజ్‌మెంట్‌తో ఆయన విస్తృతంగా చర్చలు జరిపారు. రాష్ట్రంలో అల్యూమినియం ఆధారిత పరిశ్రమల అభివృద్ధికి ఉన్న అవకాశాలను వివరించి, పలు కీలక ప్రాజెక్టులను ప్రతిపాదించారు. మంత్రి లోకేష్ మాట్లాడుతూ, భారత పారిశ్రామిక కారిడార్లలో పునరుత్పాదక ఇంధనాన్ని వినియోగిస్తూ లో-కార్బన్ గ్రీన్ అల్యూమినియం స్మెల్టర్, ఎక్స్‌ట్రూషన్ యూనిట్ ఏర్పాటు చేయాలని కోరారు. అలాగే భారత తూర్పు తీరంలోని డీప్‌వాటర్ పోర్టుల సదుపాయాలను వినియోగించుకుని కోస్టల్ అల్యూమినియం రిఫైనరీ, బాక్సైట్ దిగుమతి హబ్ అభివృద్ధికి భాగస్వామ్యం కావాలని సూచించారు. విశాఖపట్నం–చెన్నై పారిశ్రామిక కారిడార్‌ను ప్రస్తావిస్తూ, దేశంలో వేగంగా అభివృద్ధి చెందుతున్న ఆటోమోటివ్, ఎలక్ట్రానిక్స్ రంగాలకు అనుసంధానంగా హై వాల్యూ ఆటోమోటివ్ & ఏరోస్పేస్ అల్లాయ్ ప్లాంట్ ఏర్పాటు చేయాలని ప్రతిపాదించారు. దక్షిణాసియాలో పెరుగుతున్న ఫుడ్ ప్రాసెసింగ్, ఎఫ్‌ఎంసీజీ రంగాల అవసరాలను దృష్టిలో ఉంచుకుని పర్యావరణహిత అల్యూమినియం ఫాయిల్ తయారీ యూనిట్ నెలకొల్పాలని విజ్ఞప్తి చేశారు. రాష్ట్రంలో పెట్టుబడులకు అనుకూల వాతావరణం ఆంధ్రప్రదేశ్‌లో పారిశ్రామిక పెట్టుబడులకు అనుకూలమైన విధానాలు, ప్రపంచ స్థాయి పోర్టులు, విస్తృత భూసమీకరణ, వేగవంతమైన అనుమతుల వ్యవస్థ, బలమైన మౌలిక సదుపాయాలు అందుబాటులో ఉన్నాయని లోకేష్ వివరించారు. ముఖ్యంగా "స్పీడ్ ఆఫ్ డూయింగ్ బిజినెస్" విధానంతో పెట్టుబడిదారులకు ప్రభుత్వం పూర్తి సహకారం అందిస్తోందని చెప్పారు. ప్రతిపాదనలను పరిశీలిస్తాం: రుసాల్ సమావేశంలో రుసాల్ ప్రతినిధులు సంస్థ కార్యకలాపాలను వివరించారు. 2025 మార్చిలో ఆంధ్రప్రదేశ్‌కు చెందిన పయనీర్ అల్యూమినియం సంస్థలో 26 శాతం వాటాను 243 మిలియన్ డాలర్లకు కొనుగోలు చేసినట్లు తెలిపారు. ముంబై, న్యూఢిల్లీ కేంద్రాల ద్వారా వాణిజ్య లాజిస్టిక్స్, కస్టమ్స్ క్లియరెన్స్‌లు, సాంకేతిక మద్దతు సేవలను నిర్వహిస్తున్నామని చెప్పారు. భారత ఆటోమోటివ్, ఏరోస్పేస్, విద్యుత్ రంగాల అవసరాలకు అనుగుణంగా అధిక నాణ్యత కలిగిన అల్యూమినియం–సిలికాన్, అల్యూమినియం–మెగ్నీషియం మిశ్రమ లోహాలను సరఫరా చేస్తున్నామని వెల్లడించారు. దక్షిణాసియా మార్కెట్లకు సరఫరా గొలుసులో కీలక భాగస్వామిగా పనిచేస్తున్న రుసాల్, అంతర్జాతీయ రవాణా సామర్థ్యంతో ముడి పదార్థాల అవసరాలను తీర్చగలదని పేర్కొన్నారు. మంత్రి లోకేష్ చేసిన ప్రతిపాదనలను సానుకూలంగా పరిశీలిస్తామని హామీ ఇచ్చారు. ప్రపంచ అల్యూమినియం రంగంలో రుసాల్‌కు ప్రత్యేక స్థానం మాస్కో కేంద్రంగా కార్యకలాపాలు నిర్వహిస్తున్న రుసాల్ ప్రపంచంలోని అతిపెద్ద అల్యూమినియం ఉత్పత్తి సంస్థల్లో ఒకటి. బాక్సైట్ మైనింగ్ నుంచి అల్యూమినా రిఫైనింగ్, గ్రీన్ అల్యూమినియం తయారీ వరకు సమగ్ర కార్యకలాపాలు నిర్వహిస్తోంది. ALLOW బ్రాండ్ ద్వారా తక్కువ కార్బన్ ఉద్గారాలతో అల్యూమినియం ఉత్పత్తి చేస్తూ అంతర్జాతీయ మార్కెట్లో ప్రత్యేక గుర్తింపు పొందింది. ఐదు ఖండాల్లోని 20 దేశాల్లో 90 వేల మందికిపైగా ఉద్యోగులతో కార్యకలాపాలు సాగిస్తున్న ఈ సంస్థ గత ఏడాది సుమారు 12.2 బిలియన్ డాలర్ల ఆదాయం నమోదు చేసింది. రష్యా పర్యటనలో మంత్రి లోకేష్ జరుపుతున్న వరుస సమావేశాలు ఆంధ్రప్రదేశ్‌ను అంతర్జాతీయ పెట్టుబడుల గమ్యస్థానంగా నిలబెట్టే దిశగా కీలకంగా మారుతున్నాయని పరిశ్రమ వర్గాలు భావిస్తున్నాయి. ముఖ్యంగా అల్యూమినియం ఆధారిత తయారీ రంగాల్లో భారీ పెట్టుబడులు వస్తే విశాఖపట్నం–చెన్నై కారిడార్‌కు మరింత ఊతం లభించనుంది.