ఖమ్మం ప్రభుత్వ ఆసుపత్రిలో ఆకస్మిక తనిఖీ

ఖమ్మం, జూన్ 25: ప్రభుత్వ ఆసుపత్రుల్లో రోగులకు నాణ్యమైన వైద్య సేవలు అందించడంలో ఎలాంటి నిర్లక్ష్యాన్ని సహించబోమని రాష్ట్ర వ్యవసాయ, మార్కెటింగ్, సహకార, చేనేత, జౌళి శాఖల మంత్రి తుమ్మల నాగేశ్వరరావు హెచ్చరించారు. గురువారం ఖమ్మం ప్రభుత్వ ప్రధాన ఆసుపత్రిని ఆయన ఆకస్మికంగా సందర్శించి, వివిధ విభాగాలను పరిశీలించారు. ఈ సందర్భంగా వైద్య సేవలు, సదుపాయాలు, పరిశుభ్రత, ఔషధాల లభ్యత, సిబ్బంది పనితీరుపై వైద్యాధికారులను మంత్రి ప్రశ్నించారు. చికిత్స పొందుతున్న రోగులు, వారి సహాయకులతో నేరుగా మాట్లాడి, అందుతున్న సేవల తీరును తెలుసుకున్నారు. రోగులకు సకాలంలో మెరుగైన వైద్యం అందేలా చర్యలు తీసుకోవాలని, వచ్చే ప్రతి రోగికి ఏ విధమైన అసౌకర్యం కలగకుండా చూడాలని అధికారులను ఆదేశించారు. వైద్యులు, సిబ్బంది రోగుల పట్ల మర్యాదపూర్వకంగా వ్యవహరించేలా అవగాహన కల్పించాలని సూచించారు. ఆసుపత్రి ప్రాంగణంలో నిర్మిస్తున్న క్రిటికల్ కేర్ భవనం పనులను వేగవంతం చేసి, ప్రారంభానికి సిద్ధం చేయాలని సూపరింటెండెంట్‌ను మంత్రి ఆదేశించారు. ఆసుపత్రి పరిసరాల్లో పారిశుధ్యాన్ని మెరుగుపరచాలని, నీరు నిల్వ ఉండకుండా జాగ్రత్తలు తీసుకోవాలని, ప్రధాన రహదారికి ఇరువైపులా మొక్కలు నాటి సంరక్షించాలని, అంతర్గత రహదారులను గుంతలు లేకుండా మరమ్మతులు చేయాలని స్పష్టం చేశారు. ప్రజలకు మెరుగైన ఆరోగ్య సేవలు అందించడమే రాష్ట్ర ప్రభుత్వ ధ్యేయమని, ప్రతి రోగి సంతృప్తి చెందేలా సేవలు అందించాలని మంత్రి పేర్కొన్నారు. అనంతరం ఎస్‌ఐఆర్ కార్యక్రమంలో భాగంగా ఖమ్మం నియోజకవర్గంలోని విడివోస్ కాలనీలో జరుగుతున్న ఓటరు మ్యాపింగ్ ప్రక్రియను మంత్రి పరిశీలించారు. ఇంటింటి సర్వే, నమోదు ప్రక్రియ పురోగతిని అడిగి తెలుసుకుని, పారదర్శకంగా, వేగంగా పూర్తి చేయాలని, అర్హులైన ప్రతి ఓటరు జాబితాలో నమోదయ్యేలా చర్యలు తీసుకోవాలని అధికారులను ఆదేశించారు. ఈ కార్యక్రమంలో రాష్ట్ర గిడ్డంగుల సంస్థ చైర్మన్ రాయల నాగేశ్వరరావు, సుడా చైర్మన్ పువ్వాల్ల దుర్గాప్రసాద్, ఆసుపత్రి సూపరింటెండెంట్ డా. నరేందర్, వైద్యశాఖ అధికారులు పాల్గొన్నారు.