సేవా దృక్పథానికి మరో గుర్తింపు

విజయవాడ:ప్రజాసేవ,సామాజిక బాధ్యత, క్రీడా అభివృద్ధి, రాజకీయ నిబద్ధతతో ప్రత్యేక గుర్తింపు పొందిన రాజ్యసభ సభ్యుడు సానా సతీష్ బాబు మరోసారి రాజ్యసభకు ఎన్నిక కావడం ఆయన ప్రజా జీవితం పట్ల ఉన్న విశ్వాసానికి నిదర్శనంగా నిలిచింది. సాధారణ ఉద్యోగిగా ప్రారంభమైన ఆయన ప్రస్థానం దేశ అత్యున్నత శాసనసభలో రెండోసారి ప్రాతినిధ్యం వహించే స్థాయికి చేరుకోవడం విశేషం. 1972లో కాకినాడలో జన్మించిన సానా సతీష్ బాబు సాంకేతిక విద్యను అభ్యసించి ఆంధ్రప్రదేశ్ స్టేట్ ఎలక్ట్రిసిటీ బోర్డులో సబ్‌ ఇంజనీర్‌గా ఉద్యోగ జీవితం ప్రారంభించారు. అనంతరం వ్యాపార రంగంలో అడుగుపెట్టి విజయవంతమైన పారిశ్రామికవేత్తగా ఎదిగారు. అదే సమయంలో సామాజిక సేవను జీవిత లక్ష్యంగా ఎంచుకుని విద్య, వైద్యం, ఉపాధి రంగాల్లో అనేక సేవా కార్యక్రమాలు చేపట్టారు. తన సొంత వనరులతో అనేక మందికి అండగా నిలుస్తూ ప్రజల మన్ననలు పొందారు. క్రీడల పట్ల ఉన్న అభిరుచి ఆయనను క్రికెట్ పరిపాలన రంగంలోకి తీసుకెళ్లింది. ఈస్ట్ గోదావరి జిల్లా క్రికెట్ అసోసియేషన్ కార్యదర్శిగా పనిచేసిన ఆయన, భారత క్రికెట్ నియంత్రణ మండలి (బీసీసీఐ) మ్యూజియం కమిటీ సభ్యునిగా కూడా సేవలందించారు. ప్రస్తుతం ఆంధ్ర క్రికెట్ అసోసియేషన్ గౌరవ కార్యదర్శిగా కొనసాగుతూ రాష్ట్రంలో క్రికెట్ మౌలిక వసతుల అభివృద్ధికి విశేష కృషి చేస్తున్నారు. విశాఖపట్నం అంతర్జాతీయ క్రికెట్ స్టేడియం అభివృద్ధి, అంతర్జాతీయ మ్యాచ్‌ల నిర్వహణలో ఆయన పాత్ర కీలకంగా నిలిచింది. రాజకీయాల్లోకి ప్రవేశించిన తర్వాత కూడా పార్టీ అభివృద్ధి కోసం చురుకుగా పనిచేశారు. తెలుగుదేశం పార్టీ జాతీయ ప్రధాన కార్యదర్శి నారా లోకేష్ చేపట్టిన యువగళం పాదయాత్రలో కీలక బాధ్యతలు నిర్వహించారు. ఉమ్మడి తూర్పుగోదావరి జిల్లా ఎన్నికల సమన్వయకర్తగా వ్యవహరిస్తూ పార్టీ విజయానికి తన వంతు కృషి చేశారు. పార్టీ అధ్యక్షుడు, ముఖ్యమంత్రి నారా చంద్రబాబు నాయుడు మార్గదర్శకత్వంలో రాజ్యసభ సభ్యుడిగా ప్రజా సమస్యలను పార్లమెంట్ వేదికగా ప్రస్తావిస్తూ ప్రజా ప్రయోజనాల కోసం పనిచేస్తున్నారు. యువత సాధికారతకు ప్రాధాన్యతనిచ్చే నాయకుడిగా గుర్తింపు పొందిన సతీష్ బాబు, నైపుణ్యాభివృద్ధి కార్యక్రమాల ద్వారా యువతకు ఉపాధి అవకాశాలు కల్పించేందుకు కృషి చేస్తున్నారు. ఆరోగ్య రంగంలో కాకినాడ ప్రభుత్వాసుపత్రి (జీజీహెచ్) అభివృద్ధి, ఆధునిక వైద్య సదుపాయాల విస్తరణకు ప్రత్యేక చొరవ చూపారు. విపత్తులు, అత్యవసర పరిస్థితుల్లోనూ ఆయన సేవలు ప్రశంసలు అందుకున్నాయి. నేపాల్‌లో సంక్షోభ పరిస్థితుల్లో చిక్కుకున్న భారతీయుల రక్షణకు కృషి చేయడం, తుఫాన్లు మరియు ప్రకృతి వైపరీత్యాల సమయంలో సహాయక చర్యల్లో పాల్గొనడం ద్వారా తన సేవా భావాన్ని చాటుకున్నారు. ప్రజా సేవ, క్రీడా అభివృద్ధి, సామాజిక బాధ్యత, రాజకీయ నిబద్ధతల సమన్వయంతో ముందుకు సాగుతున్న సానా సతీష్ బాబు రెండోసారి రాజ్యసభకు ఎన్నిక కావడం ఆయనపై పార్టీ నాయకత్వం ఉంచిన విశ్వాసానికి, ప్రజల్లో సంపాదించుకున్న ఆదరణకు ప్రతీకగా రాజకీయ వర్గాలు విశ్లేషిస్తున్నాయి. ప్రజా సమస్యల పరిష్కారానికి, రాష్ట్ర ప్రయోజనాల పరిరక్షణకు ఆయన మరింత చురుకైన పాత్ర పోషిస్తారనే ఆశాభావం వ్యక్తమవుతోంది.