తోత‌పూరి రైతులకు ప్రభుత్వం భరోసా

అమరావతి జూన్ 3: తోత‌పూరి మామిడి రైతులకు రాష్ట్ర ప్రభుత్వం అండగా నిలుస్తుందని వ్యవసాయ శాఖ మంత్రి కింజరాపు అచ్చెన్నాయుడు స్పష్టం చేశారు. రైతులకు న్యాయమైన ధర లభించేలా, నాణ్యమైన ప్రతి పండును కొనుగోలు చేసేలా అన్ని చర్యలు తీసుకుంటున్నామని తెలిపారు. తోత‌పూరి మామిడి ప్రస్తుత పరిస్థితులు, పల్ప్ ప్రాసెసింగ్, కొనుగోలు ఏర్పాట్లపై పల్ప్ పరిశ్రమలు, బాట్లింగ్ కంపెనీల ప్రతినిధులతో నిర్వహించిన సమీక్ష సమావేశంలో మంత్రి కీలక నిర్ణయాలు వెల్లడించారు.ఉమ్మడి చిత్తూరు జిల్లాలో సుమారు 78 వేల హెక్టార్లలో తోత‌పూరి మామిడి సాగు జరుగుతుండగా, వేలాది మంది రైతుల జీవనోపాధి ఈ పంటపైనే ఆధారపడి ఉందని మంత్రి పేర్కొన్నారు. ఈ ఏడాది వాతావరణ ప్రభావంతో దిగుబడి 25 నుంచి 30 శాతం వరకు తగ్గే అవకాశం ఉన్నప్పటికీ రైతులు ఆందోళన చెందాల్సిన అవసరం లేదన్నారు. రైతుల నుంచే నేరుగా కొనుగోళ్లు... మామిడి పల్ప్ ప్రాసెసింగ్ యూనిట్లు వ్యాపారుల ద్వారా కాకుండా నేరుగా రైతుల నుంచే పండ్లను కొనుగోలు చేయాలని మంత్రి స్పష్టమైన ఆదేశాలు జారీ చేశారు. రైతులకు ఎలాంటి అన్యాయం జరగకుండా కొనుగోలు ప్రక్రియ పారదర్శకంగా నిర్వహించాలని అధికారులను ఆదేశించారు.నాణ్యమైన, పూర్తిగా పరిపక్వత చెందిన ప్రతి పండును కొనుగోలు చేస్తామని, రైతుల వద్ద ఉన్న చివరి పండు వరకు మార్కెట్ సదుపాయం కల్పించేందుకు చర్యలు తీసుకుంటామని హామీ ఇచ్చారు. కోతల్లో దశలవారీ విధానం... ఒకేసారి కోతలు చేపడితే మార్కెట్‌పై ఒత్తిడి పెరిగి ధరలు తగ్గే ప్రమాదం ఉంటుందని మంత్రి తెలిపారు. అందువల్ల రైతులు దశలవారీగా కోతలు చేపట్టేలా అవగాహన కల్పించాలని జిల్లా అధికారులకు సూచించారు. దీనివల్ల నాణ్యత మెరుగుపడటంతో పాటు మెరుగైన ధర కూడా లభిస్తుందని చెప్పారు. మూడు రాష్ట్రాల్లో సమాన ధరలపై కసరత్తు... తమిళనాడులోని కృష్ణగిరి మార్కెట్‌లో తక్కువ ధరలు నమోదవుతున్న అంశాన్ని ప్రభుత్వం సీరియస్‌గా తీసుకుందని మంత్రి తెలిపారు. ఈ సమస్య పరిష్కారానికి తమిళనాడు అధికారులతో చర్చలు జరిపి ఆంధ్రప్రదేశ్, తమిళనాడు, కర్ణాటక రాష్ట్రాల్లో సమాన ధరల విధానం అమలు దిశగా చర్యలు చేపడతామని వెల్లడించారు. 7.80 లక్షల టన్నుల ఉత్పత్తి అంచనా... ఉద్యానవన శాఖ అంచనాల ప్రకారం ఉమ్మడి చిత్తూరు జిల్లాలో ఈ సీజన్‌లో సుమారు 7.80 లక్షల మెట్రిక్ టన్నుల తోత‌పూరి ఉత్పత్తి నమోదయ్యే అవకాశం ఉంది. వాతావరణ ప్రభావంతో దిగుబడి తగ్గినా ఇతర మామిడి రకాలతో పోలిస్తే తోత‌పూరి పరిస్థితి మెరుగ్గానే ఉందని అధికారులు తెలిపారు.జిల్లాలో ప్రస్తుతం 44 మామిడి ప్రాసెసింగ్ యూనిట్లు ఉండగా, వీటిలో 37 యూనిట్లు ఈ సీజన్‌లో కార్యకలాపాలు నిర్వహించే అవకాశం ఉంది. వీటి మొత్తం ప్రాసెసింగ్ సామర్థ్యం 3.50 లక్షల మెట్రిక్ టన్నులు. ఇప్పటికే 20 యూనిట్లు కార్యకలాపాలు ప్రారంభించాయి. ప్రస్తుతం ధర ఎంత?... ప్రస్తుతం మార్కెట్లో తోత‌పూరి మామిడి ధర కిలోకు రూ.7 నుంచి రూ.7.50 మధ్య కొనసాగుతోంది. ధరలు మరింత పడిపోకుండా కొనుగోళ్లను విస్తరించే దిశగా ప్రభుత్వం, పరిశ్రమలు చర్యలు చేపడుతున్నాయి. విలువ ఆధారిత ఉత్పత్తులపై దృష్టి... ఆహార శుద్ధి పరిశ్రమల శాఖ అధికారులు మామిడి పల్ప్‌కే పరిమితం కాకుండా విలువ ఆధారిత ఉత్పత్తుల తయారీపై దృష్టి పెట్టాలని సూచించారు. మామిడి తొక్కలు, గింజల వినియోగం, వ్యర్థాల నిర్వహణపై రైతులు, పరిశ్రమలకు సాంకేతిక అవగాహన కల్పించేందుకు మైసూరులోని సీఎఫ్‌టీఆర్‌ఐ (CFTRI) సహకారంతో ప్రత్యేక వర్క్‌షాప్ నిర్వహించేందుకు ప్రతిపాదనలు సిద్ధం చేస్తున్నట్లు వెల్లడించారు. రైతులకు అండగా పరిశ్రమలు... పల్ప్ పరిశ్రమల ప్రతినిధులు కూడా తోత‌పూరి రైతులకు పూర్తి సహకారం అందిస్తామని మంత్రికి హామీ ఇచ్చారు. గత ఏడాదిలా ఒకేసారి కొనుగోళ్లు కాకుండా, ఈసారి ఎక్కువ రోజులు కొనుగోళ్లు కొనసాగించేలా ప్రణాళికలు రూపొందించామని తెలిపారు. రైతుల నుంచే నేరుగా పండ్లు సేకరించి, పండ్లు వృథా కాకుండా చర్యలు తీసుకుంటామని పేర్కొన్నారు. అయితే గత రెండు మూడు సంవత్సరాలుగా పల్ప్ పరిశ్రమ అనేక సవాళ్లను ఎదుర్కొంటోందని, గత ఏడాది డిమాండ్‌కు మించి ప్రాసెసింగ్ జరగడంతో ప్రస్తుతం భారీ నిల్వలు ఉన్నాయని వివరించారు. అయినప్పటికీ రైతుల ప్రయోజనాల దృష్ట్యా సాధ్యమైనంత మేరకు కొనుగోళ్లు కొనసాగిస్తామని వెల్లడించారు. ముఖ్యాంశాలు 78 వేల హెక్టార్లలో తోత‌పూరి సాగు 7.80 లక్షల మెట్రిక్ టన్నుల ఉత్పత్తి అంచనా దిగుబడిలో 25-30% తగ్గుదల అవకాశం రైతుల నుంచే నేరుగా కొనుగోళ్లకు ఆదేశాలు కిలో రూ.7-7.50 మధ్య కొనసాగుతున్న ధర 37 ప్రాసెసింగ్ యూనిట్లు కొనుగోళ్లకు సిద్ధం మూడు రాష్ట్రాల్లో సమాన ధరల విధానంపై ప్రభుత్వం కసరత్తు నాణ్యమైన ప్రతి పండును కొనుగోలు చేస్తామన్న మంత్రి అచ్చెన్నాయుడు హామీ.